(ខេត្តត្បូងឃ្មុំ)៖ នាព្រឹកថ្ងៃសៅរ៍ ទី១៥ ខែសីហា ឆ្នាំ២០២៦ ឯកឧត្តម កែវ ពិសិដ្ឋ តំណាងរាស្ត្រមណ្ឌលខេត្តត្បូងឃ្មុំ និងជានាយខុទ្ទកាល័យឯកឧត្តម វង សូត អនុប្រធានទី២រដ្ឋសភា បានអញ្ជើញជួបសំណេះសំណាល សួរសុខទុក្ខ និងនាំយកចង្ក្រានបរិស្ថាន ចែកជូនប្រជាពលរដ្ឋក្រីក្រ ចំនួន ៨០គ្រួសារ មកពី ១០ភូមិ ក្នុងឃុំពពេល ស្រុកពញាក្រែក ខេត្តត្បូងឃ្មុំ។
ក្នុងឱកាសនោះ ឯកឧត្តម កែវ ពិសិដ្ឋ បានពាំនាំនូវប្រសាសន៍ផ្តាំផ្ញើ និងសួរសុខទុក្ខប្រកបដោយក្តីនឹករលឹកពីសំណាក់ថ្នាក់ដឹកនាំជាតិ ជូនចំពោះបងប្អូនប្រជាពលរដ្ឋ។
ឯកឧត្តម ក៏បានលើកឡើងអំពីសភាពការណ៍តាមបណ្តោយព្រំដែនកម្ពុជា-ថៃ និងថ្លែងអំណរគុណយ៉ាងជ្រាលជ្រៅចំពោះកងកម្លាំងគ្រប់ប្រភេទ ដែលបានឈរជើងការពារបូរណភាពទឹកដី និងអធិបតេយ្យជាតិ ដោយមិនរាថយឡើយ។
ឯកឧត្តមបន្ថែមថា រាជរដ្ឋាភិបាលនៅតែបន្តអនុវត្តគោលនយោបាយកាត់បន្ថយភាពក្រីក្រតាមរយ:មូលនិធិជំនួយសង្គម ដែលផ្តល់ថវិកាឧបត្ថម្ភដល់គ្រួសារក្រីក្រ និងងាយរងគ្រោះ ជនមានពិការភាព ជនចាស់ជរា ស្ត្រីមានផ្ទៃពោះ និងក្មេងក្រោមអាយុ ២ឆ្នាំ ព្រមទាំងការផ្តល់ការបណ្តុះបណ្តាលជំនាញវិជ្ជាជីវ:សម្រាប់យុវជន នៃគ្រួសារក្រីក្រ និងងាយរងគ្រោះជាដេីម។
ទន្ទឹមនឹងនេះ ឯកឧត្តម បានណែនាំដល់បងប្អូនប្រជាពលរដ្ឋ ដែលមិនទាន់មានការងារធ្វើ ឱ្យមកចុះឈ្មោះនៅរដ្ឋបាលឃុំ ដើម្បីឱ្យអាជ្ញាធរមូលដ្ឋានជួយសម្រួលការងារ។
ឯកឧត្តម ក៏បានជំរុញឱ្យអាជ្ញាធរខេត្ត និងមន្ទីរជំនាញពាក់ព័ន្ធ បន្តខិតខំផ្សព្វផ្សាយ និងជួយសម្របសម្រួលដល់យុវជន សិស្ស-និស្សិត ដែលបានបញ្ចប់ការសិក្សា ជាពិសេសអ្នកមានជីវភាពខ្វះខាត និងមិនទាន់មានលទ្ធភាពរកការងារធ្វើតាមជំនាញ ដែលបានសិក្សា ដើម្បីឱ្យពួកគេមានឱកាសទទួលបានការងារសមស្រប និងរួមចំណែកសម្រេចបានគោលដៅនៃគោលនយោបាយបណ្តុះបណ្តាលជំនាញវិជ្ជាជីវៈរបស់រាជរដ្ឋាភិបាល ស្របតាមយុទ្ធសាស្ត្របញ្ចកោណ ដំណាក់កាលទី១។
ជាចុងក្រោយ ឯកឧត្តម កែវ ពិសិដ្ឋ បានបញ្ជាក់ថា ការផ្តល់ចង្ក្រានបរិស្ថានជូនប្រជាពលរដ្ឋ គឺជាការចូលរួមចំណែកក្នុងការការពារបរិស្ថាន កាត់បន្ថយការប្រើប្រាស់ឥន្ធនៈ ជួយលើកកម្ពស់សុខុមាលភាព និងកាត់បន្ថយការចំណាយប្រចាំថ្ងៃរបស់គ្រួសារ។
សម្រាប់អំណោយដែលបានប្រគល់ជូន ប្រជាពលរដ្ឋមួយគ្រួសារ ទទួលបាន ចង្ក្រានបរិស្ថានចំនួន១ និងថវិកាមួយចំនួន៕
